ოპოზიციონერი დეპუტატი ხატია დეკანოიძე რუსეთის პრეზიდენტის გადაწყვეტილებას ეხმიანება, რომლის თანახმადაც პუტინმა საქართველოს მოქალაქეებისთვის სავიზო რეჟიმი გააუქმა და ასევე რუსულ ავიაკომპანიებს საქართველოში ფრენის აკრძალვა მოუხსნა.
ხატია დეკანოიძის თქმით, პუტინის დღევანდელი გადაწყვეტილება არის ჯილდო საქართველოს ხელისუფლების მიერ გატარებული პოლიტიკის მიმართ.
,,პუტინის დღევანდელი გადაწყვეტილება და მე მინდა პირდაპირ ხაზი გავუსვა, პუტინის გადაწყვეტილებები ეხება საქართველოს და ეს არის კატასტროფა, არის ჯილდო საქართველოს ხელისუფლების მიერ გატარებული იმ პოლიტიკის მიმართ, რომელიც ბოლო თვეების განმავლობაში, განსაკუთრებით 24 თებერვლის შემდეგ, ქართული ოცნება, ბიძინა ივანიშვილი უკრაინაში რუსეთის ფართომასშტაბიანი აგრესიის შემდეგ ატარებს ქვეყანაში. ეს არის ანტიუკრაინული, ანტიდასავლური პოლიტიკა და ზუსტად პუტინის გადაწყვეტილება დააჯილდოებს საქართველოს ხელისუფლებას.
მინდა ხაზი გავუსვა ერთ მნიშვნელოვან საკითხს, იმ შემთხვევაში, თუ საქართველოს ხელისუფლება გააძლიერებს ანტიდასავლურ, ანტიუკრაინულ პოლიტიკას, ეს იქნება და უკვე არის აღქმული ცივილიზაციის წინააღმდეგ წასვლად და ეს აღქმულია, როგორც საქართველოს ეროვნული ინტერესების დაკნინება, რაც გულისხმობს, რომ საქართველოს მოქალაქეების 85%-ს სურს ევროკავშირში ინტეგრაცია, რაც ეწინააღმდეგება ამას. ნებისმიერი ავიაკომპანია, რომელიც შეასრულებს პუტინის სურვილს და მის გზავნილს კიდევ უფრო გააძლიერებს, დაიწყებს ავიამიმოსვლას საქართველოში, თუ ამას დათანხმდება საქართველოს ხელისუფლება, ყველამ უნდა იცოდეს, რომ რა თქმა უნდა, შესაძლებელია მოხვდნენ სანქციებში, რომლებიც დაწესდა და კიდევ უფრო ძლიერდება 24 თებერვლის შემდეგ,”- განაცხადა ხატია დეკანოიძემ.
პუტინმა რუსულ ავიაკომპანიებს საქართველოში ფრენის უფლება მისცა
